Video  /  買法拉利唔駛問幾錢
01 Jun, 2016    By Ball

買法拉利唔駛問幾錢

一來,就算知道但窮你我一生之(財)力都唔會買得起!
二來,就算你真係俾得起,如果你唔係 VVIP 級熟客,都唔駛旨意打動到法拉利出手。

好似尋日法拉利廠方就「擠牙膏式」公佈為一位來自英國的品牌忠實顧客度身訂製咗一架「只此一部」的 Ferrari 458 MM Speciale。由 Ferrari Styling Centre 操刀設計,以 458 Speciale 作基礎,車身換上鋁金屬銀白色外觀,配合埋車頂的意大利國旗拉花,夠晒搶眼!A 柱亦特別改用黑色,帶有向 288 GTO 致敬的味道。另外,包括頭尾燈以至輪圈等細節均全新依客人要求設計打造,車身兩側亦特別加入入氣口,為 4.5 升 V8 自然進氣引擎提供更佳的冷卻效果,亦令呢部 Ferrari 458 MM Speciale 的馬力達到超越 458 Speciale 的 600 匹。

不過法拉利方面對於呢部 Ferrari 458 MM Speciale 的 specifications、售價均三緘其口,而且提供的相片也只限外觀,讓人無緣一睹其奢華啡色皮革內籠。計我話,個位富豪車主肯俾車廠出發相已經好慷慨喇!

雖然話就話個位神秘買家來自英國,但又唔等如佢係英國人,唔駛睇巴拿馬文件都知啦!英國向來係全球億萬富豪的「天堂」,尤其多俄羅斯、中東巨富移居當地。

既然係獨一無二版本,呢部 Ferrari 458 MM Speciale 嘅身價只會繼續有升無跌,只要個車主(同埋佢女友、個仔、司機、工人)唔將佢撞散的話!