倒帶人生

有邊位會唔喜歡舊嘢? — 烈火戰車

倒帶人生

梁詠琪出道就擔正嘅三大片,分別係《烈火戰車》、《百變星君》同《賭神3之少年賭神》。三套入面最大發揮就係《烈火戰車》,亦為佢帶黎新演員提名。但好老實,呢三套戲嘅梁詠琪基本上都係嗰幾個表情。《烈火戰車》就鄰家少女,《少年賭神》就青春玉女,而《百變星君》就各半,上半場鄰家醜小鴨,下半就玉女。

文 / 有邊位會唔喜歡舊野?

係嘅,剛出道想演技可以有幾好呢?但擔得正就預左要求高,何況仲要三套一齊嚟?所以細個我係諗唔明點解佢可以擔正咁多戲。不過,無人可以否認,佢出道係有氣質嘅,而且係唔洗時間去浸,天生就有種倔強而清秀。呢樣嘢係恨都恨唔到,演技可以磨,但氣質無計,有就有無就無。佢可以天生有,或者突然有,但都可以點都等唔到。所以梁詠琪係有佢比人揀中嘅原因。要講嘅話,唯一比佢好嘅,應該得張栢芝,原因係佢演技比梁詠琪好。

唔知係咪兩個都係天生麗質,所以《烈火戰車 2 之極速傳說》就搵咗栢芝接捧。但佢當時係演一個未成年嘅懷春少女,而梁詠琪係演一個一直陪住個自私車手嘅鄰家女生。喺外表上,梁詠琪係需要樸素,但樸素嘅外型都掩蓋唔到佢嘅氣質。呢份倔強而清秀,可以話完全彌補左佢無咩表情嘅問題。因為佢一個表情就夠,但當你一年內出三套同一個表情嘅戲,真係幾有氣質都會膩。

《烈火戰車》當然係好戲。佢其實拍出咗男人嘅幼稚,而幼稚係無分年齡。更重要係,一個幼稚嘅男人一定有一份固執,但佢唔需要理由,佢只要咬住嗰樣嘢,佢就係唔會咁易放手。呢份執著可以為你帶嚟成功,但成功背後,又傷害咗幾多身邊人?到頭嚟,又值唔值呢?無答案。咁一個男人幾時先叫成熟?就係當佢完全明白個代價嘅時候。

明白代價,唔代表佢會放棄,只係佢會知道自己做嘅每一件事會有咩後果,而你知道之後,你係甘心去付出。劉華知道佢揀左個老婆,就要放低對第一嘅執著,佢一樣願意,因為喺佢眼中,佢老婆最重要。

無人可以話邊樣野先係好嘅選擇,只係你知道而甘心,你唔會有後悔嘅藉口。後悔係人生最無奈嘅野,因為當你要後悔,即係無得番轉頭。所以,如果有野要揀,記好好諗清楚先。唔好諗對唔對得住個世界,或者其他眼光,最重要係,你對唔對得住自己,無論你要做好人定壞人都一樣。

梁詠琪, 烈火戰車,

作者簡介

有邊位會唔喜歡舊野? 
一個供某君寫舊事物的地方,以便舒緩其活於八十年代娛樂之精神惡疾。但求放鬆自己,亦放過身邊人,阿門。

JMEN推薦